Барилгынхан биллиардаар өрсөлдлөө

xoploo
2019-11-05

Барилгынхан биллиардаар өрсөлдлөө

Эх орныхоо бүтээн босголт, хөгжил цэцэглэлтийн төлөө цаг хугацаатай уралдан, амрах завгүй ажилладаг хүмүүс бол барилгын салбарынхан. Нэг үе уналтанд ороод эргэн сэргэж байгаа энэ салбарт хүч сорих гэсэн байгууллагуудын тоо сүүлийн жилүүдэд эрс нэмэгдсэн. Тэр чинээгээрээ салбарт өрсөлдөөнийг бий болгож байгаа юм.

Барилгын салбартаа ч мөн спортод хүртэл хүчтэй өрсөлдөгч гэдгийг баталсан үйл явдал энэ амралтын өдөр болж өнгөрлөө. “Барилга.МН” БЗМТөв, МБХ, МҮХАҮТ-ын Барилгын зөвлөл хамтран энэ сарын 19-ний амралтын өдөр барилгын салбарынхны удирдах ажилтнуудын дунд биллиардын аваргыг тодруулах “Барилга биллиард -2011” тэмцээнийг амжилттай зохион байгууллаа.

“Барилга биллиард -2011” биллиардын аварга шалгаруулах тэмцээнд барилгын компаниудын удирдах ажилтнуудаас гадна барилгын салбарын төрийн болон төрийн бус байгууллагын төлөөлөл оролцсон нийт 30-аад удирдах ажилтнууд оролцлоо.

Тэмцээнд оролцохоор бүртгүүлсэн тоглогчид замын түгжрэлээс болсон уу, амралтын өдөр жаахан оройтож боссоноос болов уу? тэмцээн эхлэх ёстой байсан цагаас жаахан хоцорч тэмцээнээ эхлүүллээ. Барилгынхан энэхүү тэмцээнд ихээхэн ач холбогдол өгсөний дээр биллиардын хорхойтонгууд гэдэг нь харагдаж байлаа. Зарим тоглогчид өөрсдийн тоглох хэрэгсэлээ хүртэл авчирсан байна лээ.

Тэмцээн ширүүхэн өрсөлдөөн дунд явагдаж шигшээ хэсэгт илүүрхэж “Ремугс” ХХК-ийн захирал Т.Пүрэвдорж, “Эрэлт Импекс” ХХК-ийн захирал н.Энхтөр, “Цагаан бүрд” ХХК-ийн захирал н.Оргил, ЗТБХБЯ-ны БОСНАА ахлах мэргэжилтэн Л. Болд, “Эрэлт Импекс” ХХК-ийн ТУЗ-ийн гишүүн С. Чулуун, “Цигл” ХХК-ийн захирал н.Жавхлан, “Интеко инженеринг” ХХК-ийн гүйцэтгэх захирал Б. Энхтүвшин, “X Land констракшн”-ний дэд захирал н. Баттулга нар шалгарлаа.

Хэн илүү тэр тэмцээний тэргүүн байрыг эзэлдэг жамтай “Барилга биллиард -2011” тэмцээний аваргаар “Ремугс” компанийн захирал Т. Пүрэвдорж тодорсон бол II байрт “Эрэлт Импекс” ХХК-ийн ТУЗ-ийн гишүүн С. Чулуун, III байрт “Интеко инженеринг” ХХК-ийн гүйцэтгэх захирал Б. Энхтүвшин шалгарч биллиардаар бусдаас илүү гэдгээ нотоллоо.

Харин биллиардын тэмцээний хүчтэйхэн өрсөлдөгчөөр ЗТБХБЯ-ны БОСНАА ахлах мэргэжилтэн Л. Болд тодорлоо. “Байнга тоглоод байдаггүй өнөөдөр яагаад ч юм азтай байна” хэмээн даруухан загнасан ч шаггүй тоглогч байна гэдгийг учраанууд нь хэлсэн шүү.

“Барилга биллиард -2011” тэмцээний ерөнхий ивээн тэтгэгчээр “SAFE TIME” компани оролцож барилгынхны спортын өдрийг дэмжлээ. Барилгынхан биллиардын спортод шаггүй өрсөлдөгч гэдгээ батлаад авлаа.

Тэмцээний тэргүүн байрыг авсан “Ремугс” компанийн захирал Т. Пүрэвдоржоос тэмцээний сэтгэгдлийг нь сонслоо

Юуны өмнө тэмцээний аваргаар тодорсонд баяр хүргэе? Тэмцээний сэтгэгдлээсээ хуваалцна уу?

За маш их баярлалаа. Тэмцээн зохион байгуулалт сайтай маш сайхан болж өнгөрлөө. Бас танай хамт олонд баярлалаа гэж хэлье.

Та маш сайн тоглолоо. Биллиардаар хэр удаан хичээллэж байна вэ?

Би биллиардын спортоор 10 жил хичээллэж байна.

За баярлалаа. Таны ажилд амжилт хүсье.